Perezida Kagame usanzwe ufana ikipe ya Arsenal, yishimiye igikombe iyi kipe yegukanye cya Community Shield nyuma yo gutsinda Manchester City.
Kuri iki cyumweru mu gihugu cy’u Bwongereza kuri Wembley Stadium habereye umukino wo guhatanira igikombe cya Community Shield 2023. Ni umukino uhuza ikipe iba yarabaye iya mbere muri Premier League ndetse n’iya 2 mu mwaka ushize w’imikino.
Ikipe ya Arsenal yabaye iya 2 yacakiranaga na Manchester City yegukanye igikombe cya shampiyona.
Iminota 90 y’umukino yarangiye amakipe anganya 1-1, Manchester City niyo yari yafunguye amazamu ku munota wa 77 ku gitego cyari gitsinzwe na Palmer wari winjiye mu kibuga asimbuye naho Arsenal iza kwishyura mu minota y’inyongera y’umukino ku gitego cyari gitsinzwe na Leandro Trossard nawe wari winjiye mu kibuga asimbuye.
Kugira ngo hamenyekane uwegukana igikombe, byaje gusaba ko hitabazwa penaliti maze Arsenal yitwara neza yinjiza 4 naho Manchester City yinjiza 1 gusa. Arsenal yahise yegukana igikombe cya Community Shield 2023 gihita kiba icya 17 mu mateka yayo.
Mu bishimiye iki gikombe harimo na Perezida Kagame, usanzwe afana iyi kipe, akaba yagaragaje amarangamutima abinyujije kuri Twitter yandika ati “Nshimiye Arsenal. Byerekana ibizaza! Ushobora kubikunda gusa”.
Arsenal yegukanye igikombe cya Community Shield 2023
Perezida Kagame usanzwe ari umufana wa Arsenal yishimiye igikombe cya Community Shield batwaye
Arsenal yegukanye iki gikombe itsinze Manchester City
