M23 irashinjwa gushimuta abakinnyi 11 b’Ikipe y’umupira w’amaguru ubwo berekezaga mu mukino wa Shampiyona y’Intara mu mujyi wa Goma.
Amakuru atangazwa n’abanyamakuru bo muri Kivu ya Ruguru avuga ko abo bakinnyi ari ab’ikipe yitwa ’ONZE VEDETTES De Pinga’, bikavugwa ko ku wa 13 Mata 2024 ari bwo M23 yabashimutiye i Kitshanga bari mu nzira berekeza i Goma.
Abatanze amakuru ku ifatwa ry’aba bakinnyi bemeje ko ngo “M23 yabafashe ibita abararwanyi ba WAZALENDO”
Abazi imiterere y’imihanda yo muri DRC baremeza ko ubwo aba bakinnyi ari abo muri Pinga bakaba berekezaga i Goma ubwo bashakaga kunyura mu muhanda wa Kitshanga – Kilorirwe – Sake – Goma. Uyu akaba ari umwe mu mihanda yafunzwe na M23 kuva mu ntangiriro za Gashyantare 2024.
Hari umwe mu basesenguzi ba Bwiza wavuze ko hariya Pinga naho hari indiri y’Inyeshyamba za FDLR ziri mu zifatanya n’ingabo za Leta ya Congo (FARDC) hamwe n’abandi bafatanyabikorwa bazo mu kurwanya M23.
Uwitwa Maisha Innocent uvuga ko aharanira uburenganzira bwa muntu yahaye gasopo M23 kuri aba bakinnyi agira ati ” Ni abantu 11, tuzi isaha n’ahantu bafatiwe, bari mu biganza bya M23, kubagirira nabi kwa M23 biraba ari ikosa rikomeye”
Perezida w’iriya kipe ubwe niwe wemeje ko M23 yabahoye ko ari abarwanyi ba WAZALENDO.
Ubutumwa bugufi bwa Lt Cot Willy Ngoma uvugira M23 mu bya gisirikare wasubizaga umunyamakuru wa Bwiza TV bwavuze ko “Ikipe yamaze kugera i Goma” gusa uyu muvugizi yirinze kugira byinshi arenzaho.
